ভাৰতৰ বিশ্ব অভিলেখ

Published Date: 23 April, 2021

ভাৰতৰ বিশ্ব অভিলেখ

আমাৰ অসম, ২৩ এপ্ৰিলঃ দেশৰ প্ৰধানমন্ত্ৰী নৰেন্দ্ৰ মোদীয়ে পশ্চিমবংগৰ মুখ্যমন্ত্ৰী মমতা বেনাৰ্জীৰ বিৰুদ্ধে নিৰ্বাচনী প্ৰচাৰত ব্যস্ত থকাৰ সময়তে ভাৰতত দৈনিক ক’ভিড ভাইৰাছৰ সংক্ৰমণে বিশ্ব অভিলেখ সৃষ্টি কৰিছে৷ দেশত এদিনতে তিনি লাখৰো অধিক লোক ক’ভিডত আক্ৰান্ত হৈছে৷ ভাৰতত দৈনিক ক’ভিড আক্ৰান্তৰ সংখ্যাই এতিয়া আমেৰিকাকো পিছ পেলালে৷ আনহাতে ভাৰতত বিগত ২৪ ঘণ্টাত দুই সহস্ৰাধিক ক’ভিড ৰোগীৰ মৃত্যু হৈছে৷ যাৰ পৰিপ্ৰেক্ষিতত সমাগত কেইসপ্তাহমানৰ ভিতৰত ভাৰতৰ কৰ’না পৰিস্থিতিয়ে বিপজ্জনক ৰূপ লোৱাৰ আশংকা কৰিছে বিশেষজ্ঞসকলে৷ বিশেষকৈ মে’ মাহৰ ১১ তাৰিখৰ পৰা ১৫ তাৰিখৰ ভিতৰত ভাৰতত কৰ’নাত আক্ৰান্তৰ সংখ্যা সৰ্বোচ্ছ হ’ব বুলি আশংকা কৰিছে বিশেষজ্ঞই৷ আই আই টি, কানপুৰে চলোৱা এক সমীক্ষাত কোৱা হৈছে যে ১১ মে’ৰ পৰা ১৫ মে’ৰ ভিতৰত ভাৰতত দৈনিক আক্ৰান্তৰ সংখ্যা ৩.৫ লাখ অতিক্ৰম কৰাৰ আশংকা আছে৷ সেইদৰে এই সময়ছোৱাত ভাৰতত ৩৩ ৰ পৰা ৩৫ লাখ লোক আক্ৰান্ত হ’ব পাৰে বুলি কোৱা হৈছে৷ ফলত অহা সপ্তাহকেইটাত কৰ’নাৰ সংক্ৰমণ ভাৰতত হ্ৰাস পোৱাৰ বিপৰীতে অধিক বৃদ্ধি হ’ব৷ উল্লেখ্য যে, যোৱা ছেপ্টেম্বৰ মাহত ভাৰতত কৰ’নাত আক্ৰান্ত হৈছিল সৰ্বাধিক৷ সেই মাহটোত আক্ৰান্তৰ সংখ্যা আছিল প্ৰায় ১০ লাখ৷ এইবাৰ মে’ মাহৰ ১১ তাৰিখৰ পৰা ১৫ তাৰিখৰ ভিতৰত এই সংখ্যা ৩৩ লাখৰ পৰা ৩৫ লাখ অতিক্ৰম কৰিব পাৰে বুলি সমীক্ষাটোত কোৱা হৈছে৷ আনহাতে যোৱা ২৪ ঘণ্টাত ভাৰতত কৰ’নাত আক্ৰান্তাৰ সংখ্যাই পূৰ্বৰ অভিলেখ ভংগ কৰিছে৷ এই সময়ছোৱাত ভাৰতত প্ৰায় ৩ লাখ লোক নতুনকৈ কৰ’নাত আক্ৰান্ত হৈছে৷ কেন্দ্ৰীয় স্বাস্থ্য মন্ত্ৰণালয়ে প্ৰকাশ কৰা মতে যোৱা ২৪ ঘণ্টাত ভাৰতত আক্ৰান্তাৰ সংখ্যা ২ লাখ ৯৫ হাজাৰ ০৪১ জন৷ একেদৰে মৃত্যুৰ সংখ্যাও বাঢ়িছে৷ যোৱা ২৪ ঘণ্টাত ভাৰতত কৰ’নাত মৃত্যু হোৱা লোকৰ সংখ্যা ২০২৩ জন৷ অৱশ্যে সংক্ৰমিতৰ সংখ্যাৰ হাৰ অনুযায়ী দেশখনত মৃত্যুৰ হাৰ পূৰ্বতকৈ হ্ৰাস পাই ১.১৭ শতাংশ হৈছে৷ যিটো চলিত মাহৰ আৰম্ভণিতে আছিল ১.৩৮ শতাংশ৷ ইপিনে মহাৰাষ্ট্ৰ, উত্তৰপ্ৰদেশ, দিল্লী, কৰ্ণাটক, গুজৰাট, মধ্যপ্ৰদেশ, ছত্তীশগড়, কেৰালা আৰু তামিলনাডুত শেহতীয়াকৈ সৃষ্টি হোৱা কৰ’না পৰিস্থিতিক কেন্দ্ৰ কৰি কেন্দ্ৰীয় চৰকাৰ উদ্বিগ্ন হৈ পৰিছে।